Mouezh Paotred Breizh

Choeur d'hommes de Bretagne

Crédit photo: Ancre digitale - 35 Cancale

Un avantur denel

Mouezh Paotred Breizh zo istor ur strollad mignoned, abaoe tost da 30 vloaz, lorc’h enno o vezañ Breizhat ha gwriziennet don e Breizh. Unanet hag entanet int holl gant an hevelep tra : ar c’hanerezh a-gor liesvouezhiek.

Bez’ eo ivez istor un engouestl evit sevenadur Breizh, anezhañ ur sevenadur bev, digor war ar bed, mesket ennañ an hengoun hag ar vodernelezh. He yezh, hec’h istor, he glad, he c’hredennoù, he barzhed hag he sonerien, he maezioù hag ar mor... n’emaint ket pell en hon oberennoù morse.

Bez’ eo erfin un istor bevet asambles gant an dud. Ar mouezhioù paotred, dous a-wechoù, kreñv gwechoù all, a zegas entan, from pe levenez d’ar selaouerien. Bepred e pedont anezho da veajiñ.

Ur c’havell etrebroadel

E 1993 he doa bodet ar gevredigezh "The World Choir" korioù paotred deuet eus Kembre, Bro-Saoz, Kanada hag Aostralia. Ur bedadenn he doa lañset neuze evit ma vefe krouet unan e Breizh hag a gemerfe perzh en un abadenn veur er bloaz war-lerc’h .

Ur sapre difi e oa ar bedadenn-se, rak n’eo ket ar c’horioù paotred un hengoun en hor bro. Diwar atiz Jean-Marie Airault ha Jean-Pierre Prémel ez eus bet bodet un tregont kaner bennak, deuet eus lazoù-kanañ kemmesk a Vreizh. A-lazh-korf en deus labouret ar strollad nevez e-pad un nebeud mizioù. E 1994 e oa prest ur programm, ha gant-se e c’hallas mont da Atlanta (USA) da zileuriañ Breizh.

Breizhat penn-da-benn

Gant ar c’han, an dañs, ar sonerezh hag ar c’hontadennoù e c’heller treuzkas an istor. Adkavet e vezont hed-ha-hed darvoudoù pouezus ar vuhez. Ar brezhoneg zo ur binvidigezh hag un elfenn greñv eus hon identelezh.

Breizhat ha digor war ar bed eo al laz-kanañ. Gant e veajoù, e Frañs hag en estrenvro, ha gant e gejadennoù ez eo e bal bezañ kannad Breizh ha reiñ da glevet, fouge ennañ, hec’h istor, he douar, he yezh, he c’hredennoù hag he soñjoù.

Hengoun ha modernelezh

Tonioù hengounel eus Breizh hag eus Kembre a ya d’ober ar braz eus an oberennoù kanet gant Mouezh Paotred Breizh.

Enoriñ a ra ar skrivagnerien, ar varzhed hag an droerien a Vreizh, en ur reiñ lec’h d’ar gwellañ aozourien ha kempennerien sonioù eus ar vro.

Hep treiñ kein d’an hengoun james en em zigor d’ar vodernelezh en ur zegemer labour oberourien ha sonaozerien yaouank.

Ul laz-kanañ dibar

Ouzhpenn 130 kaner o deus sikouret da ziorren al laz-kanañ abaoe ma’z eus anezhañ. Degaset o deus-holl ampartiz ha birvilh, pep hini en e zoare.Un hanter-kant bennak a ganerien hag a sonerien a zalc’h bremañ gant oberenn o diagentourien, heñvel o youl atav. Dont a reont-holl eus a bep korn a Vreizh pe, pa lavaran mat, eus pemp departamant Breizh...

Ul laz-kanañ dave

Mouezh Paotred Breizh zo aet tamm-ha-tamm war-raok, gant pasianted. En ur ober ouzhpenn 30 vloaz eo deuet da vezañ un dave a galite evit al lazoù-kanañ brezhonek. Bep bloaz e kan ur pemzek bennak a sonadegoù, un tammig e pep lec’h e Breizh (evel, da skouer, e Festival Kerne e Kemper hag e Festival Etrekeltiek an Oriant) met ivez e Pariz ha tro-dro, en Elzas, en Euskadi, e Lyon, e Touren, e Loren, e Bearn, er Vogezioù… Ouzhpenn-se e vez troiadoù en estrenvro : Kembre, Iwerzhon, Asturiez, Latvia, Republik Tchek, Bro-Saoz, Suis, Italia, Skos, Polonia….

Kampion Breizh

Bep bloaz e kemer perzh Mouezh Paotred Breizh e kampionad Breizh al lazoù-kanañ brezhonek, aozet gant ar gevread Kanomp Breizh e Landerne.

E 2003 e oa aet Priz ar C’hrouiñ gant Mouezh Paotred Breizh evit e ganadeg "Kan glaz ar sklêrijenn".

E 2008, 2012, 2015, 2016, 2018, 2019, 2022 ha 2024 e oa aet da Gampion Breizh (kentañ rummad).

Trugarez da

Kuzul-rannvro Breizh, Ti-kêr Karaez ha France Bleu Breizh Izel a skoazell Mouezh Paotred Breizh.